Prezident Shavkat Mirziyoyev raisligida o‘tayotgan Surxondaryo viloyatini rivojlantirish yig‘ilishida Termiz xalqaro savdo markazi faoliyatini kengaytirish masalasi muhokama qilindi.
Qayd etilishicha, o‘tgan yili markazga 800 mingdan ortiq Afg‘oniston fuqarolari tashrif buyurgan, eksport hajmi 320 million dollarni tashkil etgan. Tadbirkorlar va investorlar markazda yirik ishlab chiqarish quvvatlarini yo‘lga qo‘yish tashabbusi bilan chiqqan.
Shu munosabat bilan savdo markazi hududini 1 ming gektarga yetkazish belgilandi. Mutasaddilarga joriy yilda eksportni 600 million dollarga, kelgusi yilda esa 1 milliard dollarga yetkazish, qo‘shimcha 10 ming ish o‘rni yaratish topshirildi.
Yangi loyihalar hisobiga savdo hajmi va tashrif buyuruvchilar soni sezilarli oshishi kutilmoqda. Markaz hududida qonun ustuvorligini ta’minlash maqsadida maxsus prokuratura va ichki ishlar bo‘limi faoliyati yo‘lga qo‘yiladi.
Endilikda markazdagi tovar aylanmasi va xizmatlar eksport sifatida baholanadi hamda ularga qo‘shilgan qiymat solig‘ining “nol” stavkasi qo‘llanadi.
