Termiz davlat universiteti O‘zbek filologiyasi fakultetida iste’dodli shoir, publitsist va tarjimon Mirzo Kenjabek tavalludining 70 yilligiga bag‘ishlangan “Vatan, qalblardasan, qarog‘lardasan!” nomli adabiy-badiiy kecha bo‘lib o‘tdi.
Ma’naviy-ma’rifiy ruhda tashkil etilgan tadbirda adibning hayot yo‘li, serqirra ijodi hamda milliy tafakkur va ma’rifatni targ‘ib etishdagi o‘rni alohida e’tirof etildi. Talaba-yoshlar shoir she’rlaridan namunalarni ifodali o‘qib, kechaga badiiy ruh bag‘ishladilar.
Ayniqsa, buyuk muhaddis Abu Iso Muhammad Termiziy siymosiga bag‘ishlangan “Ona rizosi” she’rining sahnalashtirilishi tomoshabinlarda chuqur ta’sir uyg‘otdi.
Mazkur adabiy kecha yoshlar qalbida Vatanga muhabbat, milliy qadriyatlarga sadoqat va ma’naviy poklik g‘oyalarini mustahkamlashda muhim ahamiyat kasb etdi.
