Prezident farmoniga ko‘ra, 2027-yildan boshlab har ikkala tomon kamida 21 yoshga to‘lib, birinchi marta nikohdan o‘tgan yosh oilalar davlat tomonidan rag‘batlantiriladi. Mazkur tashabbus yoshlarning moliyaviy va ijtimoiy jihatdan tayyor holda oila qurishini qo‘llab-quvvatlashga qaratilgan.
Hujjatga muvofiq, bunday oilalarga qo‘shimcha imtiyoz va qo‘llab-quvvatlash choralari taqdim etiladi. Agar ular Ijtimoiy reyestrga kiritilsa, subsidiya, ssuda va grant kabi moliyaviy ko‘maklar amaldagi miqdordan 1,5 baravar ko‘proq ajratiladi.
Shuningdek, nikoh shartnomasini tuzgan yoshlar nikohni qayd etish uchun to‘lanadigan davlat bojidan ozod etiladi. Ushbu qaror yoshlarni oila qurishga ongli va mas’uliyat bilan yondashishga undash, mustahkam va barqaror oilalarni shakllantirish hamda ularning iqtisodiy barqarorligini ta’minlashda muhim qadam bo‘lib xizmat qiladi.
