Dalvarzintepadan topilgan topilma Berlin ko‘rgazmasida

Surxon vohasida qanchadan-qancha ilmiy izlanishlar, tadqiqot-u ekspeditsiyalar uyushtirildiki, topilgan noyob topilmalar esa o‘z davridan hikoya qiladi. Arxeologik xazinalarimiz vohaning boy o‘tmish va kechmishga ega ekanini ko‘rsatadi. Muzeylardan joy olganlari esa har bir tomoshabinning e’tiborini tortadi, necha-necha asrlar silsilasidan olib o‘tib, tarix bilan yuzlashtiradi.
Dunyoning nufuzli muzeylarida yurtimiz eksponatlarining qo‘yilayotgani, milliy ko‘rgazma haftaliklari o‘tkazilayotgani esa dunyo ahlini O‘zbekistonga qaratayotgani, qiziqish va e’tiborni kuchaytirayotgani rost. Albatta, bu turizm sohasida tub burilish yasash bilan birga olimlarning, arxeologlarning-da nazariga tushmoqda. Milliy madaniyatimiz, urf-odat va an’analarimiz, boy madaniy va ma’naviy merosimizni ko’rish va o’rganish ishtiyoqini oshirayotir.
Ana shunday festival va namoyishlarning davomi sifatida 4-may kuni Berlinda “O‘zbekistonning arxeologik xazinalari. Makedoniyalik Iskandardan to Kushonlar sulolasigacha” ko‘rgazmasi o‘z eshiklarini ochishi ham kutilmagan va yaxshi yangilik deyish mumkin. Ko‘rgazmadan joy oladigan va alohida e’tiborga molik osori atiqa Kushon shahzodasining boshi (milodiy I-II asrlar) hisoblanadi.
1973-yilda Dalvarzintepa manzilgohida olib borilgan arxeologik qazishmalar chog‘ida topilgan ushbu ashyo alohida ahamiyatga ega. Shahzodaga osma seroltin bezakli dubulg‘a shaklidagi bosh kiyimi kiygizilgan. Bu unsurlar uning alohida ijtimoiy mavqeni egallaganiga urg‘u deyish mumkin. Haykal buddaviylar ziyoratgohining kushonlar shajarasiga mansub dalvarzintepalik zodagon asilzodalar o‘rin olgan Podshohlar mehmonxonasida o‘rnatilgan bo‘lgan.
Kushon shahzodasi qiyofasini va Kushon saltanati hukmronligiga doir boshqa noyob eksponatlar va tafsilotlarni Berlinda ko‘rish, tomosha qilish mumkin. Ko‘rgazma esa 2024-yilning 14-yanvariga qadar davom etadi.