Nazorat kuchaytirildi

Surxondaryo viloyatida ekologiya va chegara qo‘shinlari hamkorligida o‘tkazilgan reyd davomida kavrak o‘simligi urug‘larini noqonuniy yig‘ayotgan to‘rt nafar shaxs aniqlandi. Ular Bobotog‘ davlat o‘rmon xo‘jaligi hududidan tabiiy holda o‘suvchi o‘simlik urug‘larini noqonuniy ravishda olib ketayotgan vaqtida qo‘lga olindi.
Holat yuzasidan huquqbuzarlarga ma’muriy choralar ko‘rilib, jarima va tabiatga yetkazilgan zarar uchun tovon puli undirilishi belgilandi. Mazkur holat biologik xilma-xillikni saqlash, noyob o‘simliklarni muhofaza qilish hamda tabiiy resurslardan oqilona foydalanish masalasi bugungi kunda dolzarb ahamiyat kasb etayotganini yana bir bor ko‘rsatdi.