Poytaxtda o‘tkazilgan “Tinchlik, o‘zaro bog‘liqlik va barqarorlik: umumiy farovonlik poydevorini shakllantirish” mavzusidagi Termiz muloqotining ikkinchi yig‘ilishi ishtirokchilari Surxondaryo viloyatida bo‘lib, hududning xalqaro hamkorlik va mintaqalararo aloqalarni rivojlantirishdagi salohiyati bilan tanishdi.
Mehmonlar “Termiz Kargo Markaz” xalqaro transport-logistika xabi, “Termiz” xalqaro savdo markazi erkin savdo zonasi hamda Afg‘oniston fuqarolarini o‘qitish ta’lim markazida yaratilgan sharoitlarni ko‘zdan kechirdi. Taqdimotlar davomida Termizning Markaziy va Janubiy Osiyoni bog‘lovchi muhim logistika, savdo va ta’lim markaziga aylanib borayotgani alohida ta’kidlandi.
Xususan, xalqaro savdo markazi va logistika infratuzilmasi mintaqalar o‘rtasidagi iqtisodiy aloqalarni kengaytirish, eksport salohiyatini oshirish hamda yangi ish o‘rinlari yaratishga xizmat qilmoqda. Afg‘oniston fuqarolarini o‘qitish markazi esa qo‘shni mamlakat uchun malakali kadrlar tayyorlash orqali barqaror taraqqiyot va o‘zaro ishonchni mustahkamlashga hissa qo‘shmoqda.
Tadbir davomida O‘zbekistonning ochiq va pragmatik tashqi siyosati, Termizning esa Markaziy va Janubiy Osiyo o‘rtasidagi hamkorlikni rivojlantiruvchi strategik ko‘prik sifatidagi o‘rni yana bir bor namoyon bo‘ldi.
