Prezident tomonidan imzolangan yangi farmon kichik biznes sub’yektlarining faoliyatini yanada qo‘llab-quvvatlashga xizmat qiladi. Hujjatga ko‘ra, umumiy soliq rejimiga o‘tish chegarasi amalda 5 milliard so‘mgacha oshirildi. Bu esa tadbirkorlarga biznesni sun’iy ravishda bo‘lib yurmasdan, uni erkin kengaytirish va barqaror rivojlantirish imkonini beradi.
Shuningdek, farmon bilan QQS ma’muriyatchiligi soddalashtiriladi, tekshiruvlar yuklamasi kamaytiriladi hamda savdo, umumiy ovqatlanish va xizmat ko‘rsatish sohalari uchun qo‘shimcha yengilliklar yaratiladi. Ushbu o‘zgarishlar minglab tadbirkorlarning faoliyatini yengillashtirib, iqtisodiy o‘sishni rag‘batlantirishga xizmat qiladi.
