Pedagogika yo‘nalishlarida tahsil olayotgan talabalar bilimini tashqi diagnostikadan o‘tkazish tartibi tasdiqlandi. Yangi tizim pedagog kadrlar tayyorlash sifatini xolis baholash hamda ta’lim dasturlarining samaradorligini aniqlashga qaratilgani bilan ahamiyatli bo‘ldi.
Nizomga ko‘ra, har yili pedagogika yo‘nalishlarining 3-bosqich talabalari test sinovlari orqali tashqi diagnostikadan o‘tkazilishi belgilandi. Olingan natijalar talabalar reytingiga ta’sir qilmasligi, biroq oliy ta’lim muassasalarida pedagoglar tayyorlash sifati holatini tahlil qilish va takomillashtirish uchun muhim mezon bo‘lib xizmat qilishi qayd etildi.
