Kelajagiga katta umid bog’lagan yosh borki, albatta, Prezident maktabida o’qishni, munosib ta’lim-tarbiya olishni istaydi. Kirish imtihonlariga puxta tayyorgarlik ko’rib, ana shu maktabning o’quvchisi bo’lishga harakat qiladi. Shuni ham aytish kerakki, Prezident maktablari imtihonlarining 2-bosqichidan o‘ta olmagan o‘quvchilar xafa bo’lib, tushkunlikka tushishlariga hojat yo’q. Sababi ular ixtisoslashtirilgan maktablarga imtihonsiz qabul qilinadi.
Yangilik sifatida aytish mumkinki, endi ixtisoslashtirilgan maktab va maktab-internatlariga aniq fanlar yo‘nalishiga qabul 5-11-sinflarga, tabiiy fanlar yo‘nalishiga 7-11-sinflarga, keyingi o‘quv yillarida 5- va 7-sinflarga amalga oshiriladi. Har bir sinfga 24 nafardan o‘quvchi qabul qilinadi.
Kirish imtihonlari natijalari Ixtisoslashtirilgan taʼlim mussasalari agentligi tomonidan ommaviy axborot vositalarida imtihon topshirilgan kundan keyin 20 kun mobaynida eʼlon qilinadi. Shuningdek, ixtisoslashtirilgan maktab va maktab-internatlarining kirish imtihonlaridan o‘tgan o‘quvchilar to‘liq bepul taʼlim oladi. Ha aytgancha, kirish imtihonlari natijalari qayta ko‘rib chiqilmaydi va imtihon materiallari talabgorlarga taqdim etilmaydi.
H.Kamolova
