Ozod va obod Vatanda to‘y-u tantanalar, shodiyonalar yarashadi. Ko‘ngillarni shod etish, yaxshilik ulashish-u, savob ishlar qilish yarashadi. Xalqimizga xos qadriyatlar, odatlar, insoniy fazilatlar esa bolajon va odamohun ekanimizni isbotlab beradi. Qumqo‘rg‘on tumanidagi Baraka savdo majmuasida boshlangan karnay-surnay sadolari esa ana shunday bag‘rikenglikning ovozasi bo‘lib xizmat qildi.
Ushbu majmuada kam ta’minlangan ehtiyojmand oilalarning 25 nafar farzandlarining sunnat to‘ylari o‘tkazildi.
Ezgu tashabbusga bosh-qosh tuman hokimi A.Normamatov so‘zga chiqib, eng ezgu tilaklarni bildirib, to‘y bolalarga atalgan to‘yonalarni topshirdi.
Ma’naviyat festivali doirasida Respublikadan tashrif buyurgan O‘zbekistonda xizmat ko‘rsatgan artist, aktyor Mehmonali Salimovning kutilmagan tashrifi esa barchani quvontirib yubordi. Ha, niyat ezgu bo‘lsa, imkonsiz narsalar ham o‘z ro‘yobini topar ekan.
To‘ybolalar viloyatdan tashrif buyurgan san’atkorlar ijrosidagi kuy-qo‘shiqlarga raqsga tushib, shodlandilar. Yuz-ko‘zlarda tabassum, ko‘ngillar quvonchda. Yaxshilar harakati bilan boshlangan to‘y o‘zgacha shukuhda va fayzli o‘tdi.
S.Davlatova
