“Yunon-Baqtriya” xalqaro xayriya marafoni doirasidagi yugurish musobaqasi o‘tkazilgani hali yodimizdan chiqib ulgurmadi. Unda epchilligi va uddaburonligi bilan Shoxrux Davlatov 1-o‘rinni qo‘lga kiritib, 1000 AQSH dollari bilan taqdirlangan edi.
Mard yengilganini tan oladi. Ba’zilar esa g‘olibga nisbatan shunchaki omadi chopganini piching qiladi. Yugurish ham ish bo‘libdimi, deydiganlar esa bir yugurib ko‘rsa, ayniqsa, bir musobaqalashsa, buning mashaqqatini shundan keyin anglashi aniq. Yugurishning ham o‘z texnikasi bor. To‘g‘ri nafas olish, kuchni to‘g‘ri taqsimlash… bu boradan yuguruvchi e’tiborga oladigan jihatlar esa shubhasiz muvaffaqiyatga yetaklaydi.
Sariosiyolik Yengil atletikachi Shoxrux Davlatov esa bu shunchaki omad emasligini, tinimsiz izlanish, mehnat va mashaqqatlar mevasi ekanini yana bir karra isbotladi. U Qozog‘iston Respublikasi Shimkent shahrida o‘tkazilgan Xalqaro marafonda ishtirok etdi. Belgilangan muddatdan oldin 42 kilometr masofani raqiblaridan oldin bosib o‘tib, finish chizig‘ini zabt etdi va yugurish bo‘yicha chempionlikni qo‘lga kiritdi. G‘oliblik diplomi, esdalik sovg‘alari hamda pul mukofotini qo‘lga kiritga champion yigit yorug‘ yuz bilan qaytadigan bo‘ldi.
S.Murodova
