Qog‘oz qoralab, misralarni kelishtirib, she’r yozishni mashq qilib yuradigan yoshlarning orzusi ijod namunalarini qalami o‘tkir, el suygan shoir va shoiralarga o‘qib bersa, ularning fikrlarini o‘zi uchun qoida qilsa-yu, ijodiy oq yo‘lini olsa… ijodkor uchun bundan ortiq baxt bormikan? Sho‘rchi tumanidagi 9-umumta’lim maktabida tahsil olayotgan Dilso’z Ulug‘bekova ham ana shunday umidli yoshlardan.
Maktabga O‘zbekistonda xizmat ko‘rsatgan madaniyat xodimi, shoira Zulfiya Mo‘minovaning kutilmagan tashrifi yosh qalamkashning orzularini ro‘yobga chiqargandek bo‘ldi. Zulfiya Mo‘minova she’riyatga endigina tetapoya qilayotgan yoshlarni to‘plab, ularga mahorat darsi o‘tdi. Dilso‘z yanglig‘ yosh ijodkorlar o‘z she’rlaridan o‘qib, ustoz shoiraning fikrlarini tingladilar.
“Mahorat darsi” bahona maktab o‘quvchilari she’riyatning ajib bog‘ida Zulfiya Mo‘minova bilan takrorlanmas sayohatga chiqqandek bo‘lishdi.
S.Murodova
