Milliy musiqamiz jahon sahnasida

Jahon sahnasida ijro tiladigan kuy-qo‘shiq va ijrolarni tinglab turib, ba’zilari manzur bo‘ladi, ba’zilari esa barchaning ko‘nglidan joy olib, tomoshabinlar mehrini qozonadi. Bunda albatta, iste’dod va mahorat muvaffaqiyatga eltuvchi kuch vazifasini o‘taydi. Ispaniya davlatining Loret de Mar shahrida bo‘lib o‘tgan “Sea Sun Festival” xalqaro tanlovi ham ana shunday iqtidorlarni kashf eta oldi.
20 ga yaqin davlat vakillari ishtirok etgan mazkur tanlovda O‘zbekistonning chekka tog‘li Sherobod tumanidan 8-sonli Bolalar musiqa va san’at maktabi dutor sinfi o‘quvchisi Charos Absoatova ham ishtirok etdi. Charos dutorining torini shunday chertdiki, tomoshabinlar dutordan chiqqan ohangga mast bo‘ldi, jon quloqlari bilan tingladilar. E’tiborli jihati shuki, Charosning chiqishi hakamlar hay’atiga ham manzur bo‘ldi va birinchi o‘ringa munosib ko‘rildi.
Shu tariqa Charos Absoatova tashkilotchilarning esdalik sovg‘alari hamda oltin medal mukofotini qo‘lga kiritib, milliy san’atimiz va madaniyatimizni muvaffaqiyatli tarzda namoyish etdi.