Sel kelib, dovon yo‘li yopilib qoldi

O‘t balosidan, suv balosidan asrasin, deyishadi dono xalqimiz. Haqiqatan ham, tabiiy ofatlar vaqt, fursat tanlamaydi. Bu esa insonlar joniga ham xavf solishi hech gap emas. Sariosiyo tumanining tog‘li hududida qisqa muddatli kuchli yomg‘ir yog‘ishi sababli sel oqimlari kelishi hodisasi kuzatildi.
Oqibatda esa tumanning Xo‘jaasmin va Chosh aholi yashash punktlarini bog‘lovchi tog‘li dovon avtomobil yo‘liga katta xarsang toshlar va loyqalar tushib, dovon yo‘li yopilib qoldi. Muammoni bartaraf etish va harakatsiz qolib ketgan 3 ta yengil “UAZ” rusumli avtomobil va 8 nafar fuqaroni qutqarish maqsadida hodisa joyiga zudlik bilan viloyat Favqulodda vaziyatlar boshqarmasi va uning hududiy bo‘limi xodimlari yetib bordi.
Mas’ullar hamkorligida maxsus texnikalar yordamida dovon avtomobil yo‘li katta xarsang tosh hamda loyqalardan tozalandi. Qisqa fursatda avtomobil qatnovi yo‘lga qo‘yilib, 8 nafar fuqaroga amaliy yordam ko‘rsatildi. Aytish kerakki, hodisa oqibatida tan jarohati olgan va halok bo‘lganlar yo‘q.