Mahalla orastaligi ko‘ngil xotirjamligi kalitidir. Toza, ozoda hududning havosi o‘zgacha bo‘ladi; ko‘ngil xotirjam tortib, kayfiyat ko‘tariladi. Jamoa bo‘lib, yosh-u qari birlashib, bir ishga bel bog‘laganda esa mehnat qiyinchiligi ham arzimagan narsa. Qizg‘in suhbat, quyosh tafti tarovati ish bir zumda bitishi uchun ko‘makchiga aylanadi.
Sherobod tumanidagi mahallalarda tozalik ishlari qizg‘in holda boshlandi. Birdamlik bilan obodonlikni maqsad qilgan borki, qo‘liga ish qurolini olib zumda mehnatga sho‘ng‘ib ketdi. Kimdir ko‘chatlarning ostini yumshatgan bo‘lsa, yana kimdir ortiqcha shox-shabbalarni terdi. Bunda “Yashil makon” dasturining ijrosi alohida ahamiyatga ega bo‘ldi, albatta.
Ko‘chat ekib, nihol yetishtirish ko‘ngildagi g‘uborlarni yuvib ketadi. Daraxtlarning yaqin kunlarda shirindan shakar meva tugishini o‘ylab shodlanasiz. Manzarali daraxtlar faqatgina ko‘rkamligi bilangina emas, havoni tozalab berishi bilan ham sizni xursand qiladi. Sherobod tumanining “Taroqli” mahallasi faollari “Dolzarb qirq kunlik” asosida 500 dan ortiq ko‘chatlarni ona zamin bag‘riga qadashganida yuqoridagi niyatlarni ko‘zda tutishgan edi.
D.Otaqulova
