Termiz davlat muhandislik va agrotexnologiyalar universitetida 2026/2027-o‘quv yili “Bir Vatan, bir xalq bo‘lib, yangi hayot, yangi kelajakni birgalikda bunyod etaylik!” shiori ostida ko‘tarinki kayfiyat va bayramona ruhda boshlandi.
Tadbir Energetika va sanoat muhandisligi, Qurilish va irrigatsiya tizimlari hamda Agrobiologiya fakultetlari talabalari ishtirokida tashkil etildi. Unda yoshlar Mustaqillikning 35 yilligi va yangi o‘quv yili bilan muborakbod etildi.
An’anaga ko‘ra, birinchi bosqich talabalariga universitetning ramziy kaliti hamda talabalik guvohnomasining ramziy namunasi tantanali ravishda topshirildi. Kuy-qo‘shiqlar, she’rlar va samimiy tilaklar bayramga yanada ko‘tarinki ruh bag‘ishladi.
Tadbirning rasmiy qismidan so‘ng professor-o‘qituvchilar tomonidan ilk “Mustaqillik darslari” o‘tkazilib, unda Vatanga sadoqat, istiqlol qadri va yoshlarning jamiyat oldidagi mas’uliyati haqida so‘z yuritildi.
