Surxondaryo viloyati hokimi Ulug‘bek Qosimov Angor tumanida bo‘lib, hududdagi muhim masalalarni o‘rgandi. Dastlab “Angor kelajagi” savdo kompleksida yuz bergan yong‘in holati tafsilotlari ko‘zdan kechirilib, mas’ullarga kelgusida bunday holatlarning oldini olish, yong‘in va texnika xavfsizligi talablariga qat’iy rioya etilishini ta’minlash bo‘yicha topshiriqlar berildi.
Shundan so‘ng “Saidnosirxon” fermer xo‘jaligining paxta dalasida terim jarayonlari bilan tanishildi. Mavsum munosabati bilan ezgu niyatlar bilan duo qilinib, terimchilarga omad tilandi.
Tashrif davomida “Yangi O‘zbekiston qiyofasidagi mahalla” — Yuqori Xo‘jaqiya mahallasida ham bo‘linib, nuroniylar va jamoatchilik vakillari bilan muloqot qilindi. Ular mahallada amalga oshirilayotgan obodonlashtirish va bunyodkorlik ishlaridan mamnun ekanliklarini bildirdi.
