Prezident topshiriqlaridan kelib chiqib, Surxondaryoda bozorlarni raqamlashtirish jarayonlari jadallashmoqda. Jarqo‘rg‘on tumanidagi “Do‘stlik” mahallasida joylashgan “Dehqon oziq-ovqat bozori”da “Click Bazar” dasturining joriy etilishi o‘rganildi. 18 kunlik natijalarga ko‘ra, raqamli tizim bozor tushumlarini o‘rtacha 131 foizga oshirdi.
Viloyat hokimi Ulug‘bek Qosimov dastur imkoniyatlarini kengaytirish, uni boshqa bozor va savdo majmualarida tatbiq etish bo‘yicha topshiriqlar berdi. Shuningdek, 2025–2026-yillar qish-bahor mavsumi uchun oziq-ovqat mahsulotlari zaxirasini shakllantirish, sovutkichli omborxonalarni tashkil etish va modernizatsiya qilish masalalari muhokama qilindi.
Asosiy oziq-ovqat narxlari o‘rganilib, yarmarkalar faoliyatini kuchaytirish hamda narxlarning sun’iy oshirilishiga yo‘l qo‘ymaslik bo‘yicha aniq vazifalar belgilandi.
