Har bir soha ayni yo‘nalishda tahsil olayotgan yoshlar uchun qiziq. Ular ham sohada yangilik qilishga, “Amerikani kashf etishga” qodirdek his etishadi o‘zlarini. Bunday kayfiyat, xohish-istakning bo‘lgani yaxshi.
Umidli yoshlargina tizimlarda yangilik qila oladi, tashabbus ko‘rsata oladi. “22-aprel — Butunjahon Yer kuni” munosabati bilan Termiz muhandislik texnologiya instituti hamkorligida Geogezya kadastr va kartografiya yo‘nalishidagi talabalari ishtirokida o‘tkazilgan tadbir orqali talaba-yoshlarning ko‘zlarida ana shunday uchqunni sezish mumkin bo‘ldi.
Tadbirda talabalarning kadastr sohasidagi qiziqishlarini bilish va yoshlar orasidan iqtidorlilarini tanlab olish, kelajakda ish bilan taʼminlash maqsadida “Rahbar va yoshlar uchrashuvi” tashkil etildi. Unda Kadastr agentligi Surxondaryo viloyati boshqarmasi boshlig‘i M.Abdiraxmanov tomonidan eng namunali va aʼlochi talabalar esdalik sog‘alari bilan taqdirlandi.
Uchrashuvdan so‘ng talabalar soha mutaxassislari tomonidan zamonaviy geodezik asbob-uskunalari bilan tanishtirildi. Tanishuv “Zakovat” intellektual o‘yiniga ulanib, yoshlar qizg‘in munozaralar olib bordilar.
Ochiq dars ko‘rinishidagi amaliy seminar esa yoshlarning sohaga oid bilimlarini yanada mustahkamlashga xizmat qildi. Bir so‘z bilan aytgan shu kuni barchaning vaqti mazmunli o‘tdi.
