1 ming 350 tup daraxt koʻchatlari ekildi

“Yashil makon” umummilliy loyihasi yurtimizda keng quloch yozgandan buyon yon-atrofimiz bog‘-u bo‘stonga, gulzorga aylanib bormoqda. Avvaliga ushbu loyihaga yuzaki qaraganlar ham shu kunga qadar ko‘zlangan maqsad jiddiyligini tushunib yetdi. Ana shunday maqsadlarga mushtarak tarzda “Yuqori To‘palang” milliy tabiat bog‘i xodimlari ham bir chetda qarab turmay, o‘z hissasini qo‘shishdi.
Koʻchat ekish ishlari qizgʻin davom etdi. Asosiysi, ko‘chat tanlashda hududning iqlimi, tuproq unumdorligi kabi jihatlar ham e’tiborga olindi. Har bir ko‘chatning tutib, gurkirab yashnashi uchun mas’uliyatni milliy tabiat bog‘ining xodimlari o‘z zimmalariga olishdi. Bogʻ hududida bahorgi koʻchat ekish mavsumi davomida jami 1 ming 350 tup mevali va manzarali daraxt koʻchatlari ekildi.