Harbiy vatanparvarlik karvoni olis hududlarda

Harbiy vatanparvarlik karvoni yetib borgan manzillarda yoshlar o‘zini shu yurtga kerakdek his etayotgani haqiqat. Unga xizmat qilish esa eng oliy burch ekaniga yana bir karra amin bo‘lishayotir. Axir, vatan xizmatiga kambasta bo‘lishni istamagan yosh bo‘lmasa kerak. Harbiylik libosidagi askarlarni, ularning jangovar holati, jismoniy tayyorgarligini kuzatish esa barchani ulardek bo‘lishga havas uyg‘otishi ham bor gap. Shu ma’noda Muzrabot tumani hokimligi, Janubi-G‘arbiy maxsus harbiy okrug tasarrufidagi Termiz, Xayraobod garnizonlarida joylashgan harbiy qismlar, Termiz harbiy prokuraturasi, Surxondaryo viloyatidagi kuch tuzulmalar bilan hamkorlikda viloyat markazidan olis bo‘lgan chegaraoldi hududda harbiy vatanparvarlik festivali bo‘lib o‘tdi.
Tadbirda so‘zga chiqqanlar so‘nggi yillarda O‘zbekiston Respublikasi Prezidenti, Qurolli Kuchlarimiz Oliy Bosh qo‘mondoni Shavkat Mirziyoyev rahnamoligida mudofaa sohasida olib borilayotgan islohotlar, armiya va xalqning faol hamkorligi yuzasidan amalga oshirilayotgan sa’y-harakatlar to‘g‘risida fikr bildirdilar. Shundan so‘ng, harbiy orkestr va maktab o‘quvchilari tomonidan tayyorlangan konsert dasturidan o‘rin olgan Vatanni madh etuvchi kuy va qo‘shiqlar ishtirokchilar qalbidan chuqur joy oldi.
Kuch tuzilmalari vakillarining xizmat itlari, Faxriy qorovul shaxsiy tarkibining ko‘rgazmali chiqishlari, qurol-aslaha va harbiy texnika ko‘rgazmasi yoshlarda harbiylikka bo‘lgan qiziqishini yanada orttirib, ularga unutilmas taassurotlarni taqdim etdi.