Hokim yordamchilari uchun o‘quvlar boshlandi

Yurtimizda rahbar va salohiyatli kadrlar zaxirasi uchun munosib nomzodlar saralanib kelinadi. Mahallalarda faoliyat olib borayotgan hokim yordamchilari ham “Salohiyatli kadrlar rezervi”ga kiritilganini e’tirof etib o‘tish lozim. Albatta, har kim ekkanini o‘radi deganlaridek, o‘z ishiga munosib, natija ko‘rsatib, rahbarlik tashabbusini ko‘rsatayotganlar yuqori cho‘qillar sari odimlashi uchun yo‘naltirilsa, ishiga munosib bo‘lmaganlar esa kurmak misol guruchdan ajratib tashlanaveradi. Gap salohiyatli kadrlar rezervi haqida ketar ekan, ushbu rezervga kiritilgan hokim yordamchilarini rahbarlikka tayyorlash bo‘yicha maxsus o‘quv-amaliy seminar boshlandi.
Davlat boshqaruvi akademiyasida respublikaning 14 ta hududidan saralab olingan 90 nafar hokim yordamchilari uchun maxsus o‘quvlar boshlanib, rejaga muvofiq kurslar boshlab yuborilgan. Ushbu o‘quv-amaliy seminar hokim yordamchilarining ijtimoiy-iqtisodiy, siyosiy-huquqiy, ma’naviy-ma’rifiy sohadagi bilimlarini oshirishga xizmat qiladi. Qolaversa, shaxsiy va boshqaruv ko‘nikmalarini rivojlantiradi.
O‘quv kurslar davomida tinglovchilar uchun O‘zbekistonda kadrlar siyosati va davlat fuqarolik xizmatida amalga oshirilayotgan islohotlar, davlat xizmatida korrupsiyaga qarshi kurashish, diplomatik protokol va xizmat etiketi, muloqot va muomala madaniyatini shakllantirish bo‘yicha treninglar o‘tkaziladi. Seminarlar joriy yilning 3-fevraliga qadar davom etadi va yakunda nomzodlarning olgan bilimlari va salohiyatlarini aniqlash maqsadida test va suhbat tashkil etiladi.