Yoshlarning tarixiy xotirasini mustahkamlash, milliy qadriyatlarga hurmat ruhida tarbiyalash hamda dunyoqarashini kengaytirishda ma’rifiy sayohatlar muhim ahamiyat kasb etadi. Shu maqsadda Surxondaryo viloyatidagi umumiy o‘rta ta’lim maktablarining bir guruh iqtidorli va faol o‘quvchilari “O‘quvchi-yoshlarni muzeylarga ma’rifiy sayohati” loyihasi doirasida ikki kunlik safar bilan Toshkent shahriga yo‘l oldilar.
Sayohat davomida o‘quvchilar “Shahidlar xotirasi” yodgorlik majmuasi, Temuriylar tarixi davlat muzeyi, Islom sivilizatsiyasi markazi hamda poytaxtning boshqa tarixiy va madaniy maskanlarida bo‘lib, xalqimizning boy merosi va buyuk ajdodlarimizning jahon tamadduniga qo‘shgan ulkan hissasi bilan yaqindan tanishadilar.
Mazkur loyiha yoshlarning tarixga qiziqishini oshirish, vatanparvarlik tuyg‘usini mustahkamlash va ma’naviy kamolotini yuksaltirishga xizmat qilishi bilan ahamiyatlidir. Sayohat ishtirokchilarining xavfsizligi va qulayligi uchun barcha zarur sharoitlar yaratilgan.
