Vatanimiz mustaqilligining 35 yilligi arafasida Qumqo‘rg‘on tumanida yoshlar kelajagiga qaratilgan bunyodkorlik ishlari izchil davom etmoqda. Yangiobod mahallasidagi 53-sonli umumta’lim maktabi uchun barpo etilgan yangi o‘quv binosi foydalanishga topshirildi. Umumiy qiymati 2 milliard 731 million so‘m bo‘lgan loyiha doirasida 180 o‘rinli qo‘shimcha bino qurilib, o‘quvchilar uchun zamonaviy va qulay ta’lim muhiti yaratildi.
Tantanali ochilish marosimida tuman hokimi o‘rinbosari N. Allanazarov, deputatlar, nuroniylar, faxriy ustozlar va o‘qituvchilar ishtirok etdi. Tadbirda yangi imkoniyatlardan samarali foydalanish, o‘quvchilarga puxta bilim va munosib tarbiya berish, ularni Vatanga sadoqatli va barkamol insonlar etib voyaga yetkazish muhimligi ta’kidlandi.
Yangi o‘quv binosi Qumqo‘rg‘on yoshlari uchun Mustaqillik bayrami arafasidagi munosib tuhfa bo‘lib, ta’lim sifatini oshirish va yosh avlod salohiyatini ro‘yobga chiqarishga xizmat qiladi.
