Toshbaqaga nos chektirganlar jarimaga tortildi

Bugun marrani yuqori olib, til o‘rganishga, ilm-fanda yangiliklar qilishga, tanlagan sohamizda yuqori natijalarga erishayotgan paytimizda kimlardir bezorilik qilayotgani, tabiatga, ekologiyaga zarar keltirayotgani, jonivorlarga ozor berayotgani ayanchli. Xuddi shunday ijtimoiy tarmoqlarda ikki nafar fuqaro O‘rta Osiyo cho‘l toshbaqasiga majburiy ravishda nos chektirishgani bo‘yicha tarqalgan videolavha ko‘plab muhokamalarga sabab bo‘ldi. E’lon qilingan xabar yuzasidan Surxondaryo viloyati Ekologiya, atrof-muhitni muhofaza qilish va iqlim o‘zgarishi boshqarmasi, viloyat IIB hamda viloyat Milliy gvardiya boshqarmasi xodimlari tomonidan o‘rganish ishlari olib borildi.
O‘rganishda odamiylikka to‘g‘ri kelmaydigan mazkur holatni Denov tumani «Yangi kuch» mahallasida istiqomat qiluvchi fuqarolar H.N va M.Nlar joriy yilning aprel oylari boshlarida sodir etgani aniqlandi. Fuqarolar bilan o‘zaro bo‘lgan suhbatda fuqaro H. N ijtimoiy tarmoqdagi shaxsiy sahifasini yuritish uchun mahallasidagi dashtlikdan toshbaqani ushlab, nos chektirganini ta’kidladi.
Holat yuzasidan Denov tuman Ichki ishlar bo‘limi tomonidan ikki nafar fuqaroning har biriga nisbatan O‘zbekiston Respublikasi Ma’muriy javobgarlik to‘g‘risidagi kodeksning 111-moddasiga asosan BHMning 3 barobari – 1 million 20 ming so‘m miqdorida jarima belgilandi.