Yoshlar va turizm ko‘chalari taqdimoti o‘tkazildi

Turizm hududning turistik salohiyatini, madaniyati, urf-odatlarini, tabiati-yu nechog‘lik qadimiy va ko‘hna ekanini ko‘z-ko‘z qilishga, namoyon etishga, dunyoga tanitishga xizmat qiladi. Yurtimizga tashrif buyuradigan har bir turist uchun qulaylik yaratish, sayohatdan ko‘ngli to‘lishi uchun esa munosib xizmat ko‘rsatish, zaruriy qulayliklarni yaratish talab etiladi.
Yana bir gap, g‘arb madaniyatiga mansub mehmon uchun sharqona hayot tarzi, odamlari, qiziqishlar-yu, milliy taomlari qiziq tuyiladi. Ana shunday qiziqishlarga monand javob qaytarilishi esa nur ustiga nur.
Viloyat hokimi Termiz shahri va tumanlar markazida yoshlar va turizm ko‘chalarini tashkil etish bo‘yicha loyihalarni ishlab chiqish topshirig‘ini berganlarida ham ayni vohaga keladigan turistlarning e’tiborini jalb etish, hayot tarzimiz bilan yanada yaqinroq tanishtirish imkonini berishi bilan ahamiyatli. Viloyat hokimligida mazkur topshiriqqa asosan ishlab chiqilgan loyihalar hududlar rahbarlari va soha mutasaddilari tomonidan taqdimot qilindi.
Viloyat rahbari ishlab chiqilgan loyihalar bilan tanishib, har bir hududning o‘ziga xosligini inobatga olgan holda aholi uchun barcha qulayliklarni yaratish lozimligini ta’kidladi. Shuningdek, ko‘chalarning ixtisoslashuvidan kelib chiqib, infratuzilma va obyektlar tartib bilan joylashtirilishi kerakligi ko‘rsatib o‘tildi. Mas’ullarga loyihalarni boshlash, sifatli olib borish va belgilangan muddatlarda foydalanishga topshirish vazifasi yuklandi.