Dunyoda shoir koʻp. Ammo, salmoqli ijod qilib, yuraklarni sel qiladigani, qalami bilan choʻqqilarni zabt etadigani, har satri tarixga muhrlanadiganini koʻp deb ayta olmaymiz. Surxonning suvidan sipqorib, tuz-noni, oshidan totinib, taftli haroratidan bahra olib, qalamga oshno tutinib, qoʻliga qalam olganlarini ana shu biz sanaydigan koʻplar safiga hech ikkilanmasdan qoʻsha olamiz. Shu jumladan, oltinsoylik Qoʻchqor Norqobilni ham.
Otashnafas, qalami oʻtkir, ijodda tub burilish yasay olgan ushbu ijodkor oʻzi tugʻilib oʻsgan zaminda ziyolilar, kitobxonlar va yoshlar bilan uchrashib, kitob va kitobxonlikni, adabiyotni targʻib etuvchi ijodiy uchrashuvlar oʻtkazish ishtiyoqida Oltinsoyga keldi.
Yozilajak yangi asarlariga qahramonlar va mavzular izlamoqda. Izlanuvchan yoshlarga adabiyot sohasidagi bilim va tajribasini oʻrgatyapti.
Yaratgan yarlaqagan iste’dod egasi Qoʻchqor Norqobil she’riyatini sevadigan, ijodini intiqib kutadigan, muntazam oʻqib oʻrganib boradigan yoshlar uchun bu oʻziga xos yangilik boʻldi. Sevimli shoirdan maslahat va tavsiyalar olish, suhbatiga oshno tutinib, ijod namunalaridan bahramand boʻlish ular uchun olam-olam quvonch bag‘ishlagan boʻlsa ajab emas.
A.Safarova
