Mahallangizga sport maydonchasini sovg‘a qiling

Sport sog‘lik garovi. Yoshmi-keksami sog‘lom turmush tarziga amal qilsa, doimo sport bilan shug‘ullanib tursa, hech qanday dard ham, ortiqcha vazn ham bezovta qilmaydi. Ana shunday paytda o‘zimiz yashaydigan hududda yoki mahallada sport maydonchasi bo‘lsa, bu yanada qulaylik yaratardi. Bu esa davlat dasturidan mablag‘ ajratilishini yoki “Open byudjet” orqali mablag‘ yutib olishimiz kerakligini ko‘rsatadi.
O‘zbekiston Respublikasi Sport vazirligi tashabbusi bilan 1-iyun — Xalqaro bolalarni himoya qilish kuni arafasida respublikamizning barcha tuman, shaharlarining har biriga bittadan sport maydonchasi qurib berish bo‘yicha tanlov o‘tkazilmoqda. Sport maydonchalari ovoz berish yo‘li bilan g‘olib bo‘lgan mahallalarga qurib beriladi.
Ha aytgancha, ovozlar joriy yilning 10-mayidan 1-iyunigacha tashabbus.sport.uz saytida qabul qilinadi.