Soliq va boshqa to‘lovlarni vaqtida to‘laysizmi? Balki to‘lov uchun soliq idorasiga borish, navbat kutish va vaqt masalasi sizni qiynab, o‘z vazifangizni bajarishga halqit berar. Endi esa bunday ovoragarchiliklarning oldi olindi. Buning uchun “Soliq” mobil ilovasini uyali telefongingizga ulasangiz bo‘lgani.
Bugungidek texnologiyalar rivojlangan bir paytda bunday imkoniyatlar insoniyatga qulaylik yaratadi. Surxondaryo viloyat hokimligi katta majlislar zalida kengaytirilgan tarzda videokonferentsaloqa shaklida “Soliq” mobil ilovasi taqdimoti bo‘lib o‘tdi. Taqdimotda viloyat hokimi To‘ra Bobolov, viloyat kengashi deputatlari, tashkilot, idora, korxona va boshqarmalar rahbarlari hamda shahar va tumanlar hokimliklaridagi studiyalardan mas’ullar ishtirok etishdi.
Viloyat davlat soliq boshqarmasi mutaxassislari esa “Soliq” mobil ilovasi imkoniyatlari, qulayliklari va afzalliklari haqida to‘xtalishdi. Namoyish etilgan videoqo‘llanma esa mazkur ilovani mobil aloqa vositasiga o‘rnatish va undan foydalanish tartiblari haqida batafsil ma’lumot berdi.
Aytish kerakki, mobil ilovadagi “Umumiy xizmatlar”, “Personal xizmatlar” va “To‘lov xizmatlari” bo‘limlaridagi interaktiv xizmatlar qisqa fursatlarda, ortiqcha ovoragarchiliklarsiz o‘zini o‘zi band qilish, soliqlarni to‘lash, ish haqi to‘g‘risida ma’lumotlar olish va ko‘chmas mulkni ijaraga berish shartnomalarini ro‘yxatdan o‘tkazish kabi xizmatlarni amalga oshirish imkoniyatlarini beradi.
Taqdimot yakunida ishtirokchilarning savollariga mutaxassislar tomonidan javob berildi.
Sohibjamol
