Sog‘lom va tetik bo‘lish uchun albatta, sog‘lom turmush tarziga, tozalikka, gigiyenaga amal qilish bilan birga ovqatlanish ratsioniga rioya qilmoq va sportni kanda qilmaslik lozim. Sport deganda ham qandaydir mashg‘ulotlar bilan band bo‘lish emas, piyoda yurish, ertalabki badantarbiyani unutmasak bo‘lgani. Mana shunday oddiy haqiqatlar sog‘lom yashashga, uzoq umr ko‘rishga xizmat qiladi. Afsuski, bunga har doim ham e’tibor bermaymiz yoki rioya qilmaymiz.
Angor tumanidagi “Zang” oilaviy shifokorlik punktida viloyat davolash-profilaktika muassasalari va tuman tibbiyot birlashmasining oliy toifali tibbiyot xodimlari aholini chuqurlashtirilgan tibbiy ko‘rikdan o‘tkazish bahonasida ana shunday haqiqatlarni tushuntirishga harakat qilishdi. Tibbiyot xodimlari aytayotganlariga o‘zlari amal qilishlarini ko‘rsatish maqsadida tuman ahli bilan birgalikda 5000 ming qadam piyoda yurib, toza havoda sayr qildilar.
Shundan so‘ng, chuqarlashtirilgan tibbiy ko‘rik boshlanib ketdi. Pulmonolog, nevropatolog, pediatr, ginekolog, okulist, travmatolog, kardiolog, onkolog, stomatolog, urolog, terapevt, LOR, infesionist, xirurg kabi mutaxassislar sog‘igida shikoyatii bor bemorlarni ko‘rikdan o‘tkazib, kerakli maslahat va tavsiyalarni berishgan bo‘lsa, rentgent flyuro, mammografiya, UZI, EKG kabi tekshiruvlari ham aniq tashxis qo‘yishga xizmat qildi.
S.Murodova
