Davlat xavfsizlik xizmatining Surxondaryo viloyati bo‘yicha boshqarmasi xodimlari tomonidan o‘tkazilgan tezkor tadbirda 5 kilogramm 362 gramm opiyni sotayotgan ikki nafar fuqaro qo‘lga olindi.
Ma’lum qilinishicha, DXX Chegara qo‘shinlari hamda viloyat Ichki ishlar boshqarmasi bilan hamkorlikda Termiz tumanida tashkil etilgan tezkor tadbir davomida Termiz shahrida yashovchi, 1972- va 1995-yillarda tug‘ilgan ikki fuqaro shartli xaridorga jami besh o‘ramdagi opiyni sotayotgan vaqtida ushlangan.
Aniqlanishicha, giyohvandlik vositalari ularga qo‘shni Afg‘onistondagi narkokurerlar tomonidan yetkazib berilgan. Gumonlanuvchilardan biri muqaddam o‘g‘rilik, ikkinchisi esa giyohvandlik vositalari bilan bog‘liq jinoyat uchun sudlangan.
Mazkur holat yuzasidan jinoyat ishi qo‘zg‘atilib, hozirda tergov harakatlari olib borilmoqda.
