Oila institutini mustahkamlash, xotin-qizlarni qo‘llab-quvvatlash hamda mahallalarda ijtimoiy xizmatlar sifatini oshirish bugungi kunda davlat siyosatining ustuvor yo‘nalishlaridan biri hisoblanadi. Shu maqsadda hududlarda amalga oshirilayotgan ishlar doimiy e’tiborda.
O‘zbekiston Respublikasi Bosh vazirining o‘rinbosari – Oila va xotin-qizlar qo‘mitasi raisi Zulayho Mahkamova Termiz tumaniga tashrifi davomida Orol mahallasidagi “Oila maskani” faoliyati bilan tanishdi.
Tashrif chog‘ida markazda aholiga ko‘rsatilayotgan ijtimoiy, huquqiy va psixologik xizmatlar, oilalar barqarorligini ta’minlash, xotin-qizlarni qo‘llab-quvvatlash hamda muammoli oilalar bilan manzilli ishlash bo‘yicha olib borilayotgan ishlar ko‘rib chiqildi.
Shuningdek, markaz faoliyati samaradorligini yanada oshirish, murojaatlar bilan ishlash tizimini takomillashtirish va ilg‘or tajribalarni keng joriy etish yuzasidan mas’ullarga tegishli tavsiya va topshiriqlar berildi.
