Shvetsiyada bir juft ota-ona o‘zlarining uch nafar farzandining tish gigiyenasiga loqayd munosabatda bo‘lgani uchun har biri 8 oyga ozodlikdan mahrum qilindi. Bu haqda mamlakatning yetakchi nashrlaridan biri — “Aftonbladet” gazetasi xabar berdi.
Tibbiy ko‘rik chog‘ida aniqlanishicha, maktabgacha yoshidagi qiz va ikki o‘g‘ilning tishlari chuqur kariyes bilan zararlangan. Holat shu darajada og‘ir bo‘lganidan, ba’zi tishlarni olib tashlashga majbur bo‘lishgan. Qizcha narkoz ostida 8 ta tishidan ajralgan, har bir o‘g‘il bola esa 4 tadan tishini yo‘qotgan. Yana aniqlanishicha, og‘iz bo‘shlig‘i infektsiyalangan, og‘riqli yiringli yallig‘lanishlar yuzaga kelgan.
Ish bo‘yicha prokuror bunday holatni “jinoyat” deb atagan va sudda ota-onalarni qamoq jazosi bilan jazolash tarafdori bo‘lgan. Sud jarayonida ota-onalarning har biriga 8 oy qamoq jazosi tayinlagan.
