Afg‘onistonda temiryo‘l liniyasi tiklanadi

Bejizga temiryo‘l iqtisodiyotning qon tomiridir deyishmaydi. Haqiqatan ham davlatlarning asosiy savdo aloqalarini amalga oshirishda ko‘prik vazifasini bajaruvchi temiryo‘llar muhim ahamiyat kasb etadi. Shu maqsadda temiryo‘llar qurilishiga alohida e’tibor qaratiladi.
Ma’lumki, “Hayraton” stansiyasida “O‘zbekiston temiryo‘llari” hamda Afg‘oniston temiryo‘l boshqarmasi vakillari ishtirokida Hayraton-Mozori Sharif temiryo‘l liniyasi qayta tiklanib, ta’mirlash ishlari boshlanishi kerak edi. Kuni kecha amaliy sa’y-harakatlarni boshlashga bag‘ishlangan ochilish marosimi bo‘lib o‘tdi va tiklash ishlari bosqichma-bosqich amalga oshirilishi boshlandi. Shundan kelib chiqib, “O‘zbekiston temiryo‘llari” tomonidan birinchi bosqich uchun 120 nafar ishchi xodim safarbar qilindi.
Birinchi bosqichda yuk vagonlarini qisqa muddatda “Naibobod” stansiyasiga yetkazib berish ko‘zda tutilgan. Ushbu maqsadda “Hayraton” stansiyasining “B” parkida hamda temiryo‘l infrastrukturasining 57 kilometr bo‘lgan hududlarida to‘liq tiklash ishlari parallel ravishda tashkil etilgan.