“Qizimning sepiga kitob”

Kelinni kelganda ko‘r, sepini yoyganda ko‘r deyishadi. Haqiqatan ham kelinning sepi do‘stu dushmanning havasi va hasadini keltirishi rost. Axir ota-onaning butun umr yig‘ingani shu bir to‘yda ko‘z-ko‘z bo‘ladi-da. Qizning sepida tilla taqinchoqlaru yaltir-yultir kiyim-kechaklar, upa-eligu uy-ro‘zg‘or buyumlari, chet el brendi bo‘lgan mebellarni aytmaysizmi, bari badastir bo‘ladi. Kim ham qizining sepi uchun bir sandiq kitob berisharkin? Bunday sep esa har qanday zaru javohirdan qimmatli.
Denov tumanidagi “O‘rtaqishloq” mahalla fuqarolar yig‘inida “Buvijonlar ma’rifati”, “Qizimning sepiga kitob” mavzusida bo‘lib o‘tgan ma’naviy-ma’rifiy tadbirda ayni jihatlarga to‘xtalib o‘tildi. Tadbirda mutasaddi tashkilotlar vakillari, mahalla faollari va oqila ayollar ishtirok etdi.
Tassurotlarga boy bo‘lgan tadbirda katta hayot tajribasiga ega nuroniy onaxonlarimiz boshidan o‘tgan kunlarni yoshlarga gapirib berdilar. Shuningdek, chiroyli kuy-qo‘shiqlar davraga o‘zgacha fayz kiritdi. Ma’naviy-ma’rifiy tadbir qizlar uchun tarbiya maktabi vazifasini o‘tash barobarida, buvijonlar o‘gitlari ularga hayot yo‘llarini to‘g‘ri tanlashlariga zamin yaratadi.