Qish kunlari bo‘lishiga qaramay, janubiy viloyatimizda allaqachon bahor nafasi hukmron. Tinimsiz yog‘ayotgan yomg‘ir esa qishloq xo‘jaligi sohasi uchun ayni muddao. Bunday ob-havo sharoiti dalada ishlarning qizg‘in tus olishiga sharoit yaratadi. Shu jihatdan Muzrabot tumanida ham albatta, ariqlarni betonlash, tinim davrida bo‘sh yer maydonlarini shudgorlash, mahalliy o‘g‘itlarni chiqarish, g‘alla parvarishi avj pallada. Amalga oshirilayotgan ishlarni ko‘zdan kechirish maqsadida Surxondaryo viloyati hokimi Ulug‘bek Qosimov Muzrabot tumanida bo‘lib, mutasaddilarning axborotlarini tingladi.
Shu bilan birga tumanning “Kampirtepa” hududida “Pomir agroklaster” MChJning 76 gektarlik dala chetlaridagi 2,7 kilometr ichki ariqlarni betonlash ishlari ko‘zdan kechirildi. Suv muammosini biroz bo‘lsa-da, yumshatish, uning ortiqcha sarfini kamaytirish uchun ariqlarni betonlash muhim ahamiyatga ega ekanligi ta’kidlanib, ishlarni sifatli tashkil etganlarga minnatdorchilik bildirildi. Qishloq xo‘jaligi sohasidagi tadbirlarni mas’uliyat bilan bajarish yuzasidan vazifalar belgilab berildi.
