Aholiga bepul ko‘mir tarqatildi

Yurtimizda ijtimoiy himoyaga muhtoj qatlam vakillariga doimiy g‘amxo‘rlik ko‘rsatilib, keraklicha qo‘llab-quvvatlanayotganidan xabarimiz bor. Ularning bandligini ta’minlash, oliy ta’limga o‘qishga kirishlarida imtiyoz va qo‘shimcha kvotalar ajratilayotgani ham fikrimiz isbotidir. Mana shunday doimiy manzilli yordam ko‘rsatib kelinayotgani fuqarolar turmushini yaxshilab, jamiyatda o‘z o‘rinlarini topishlariga turtki bo‘layotir.
Uzun tumanida ham kuz-qish mavsumiga puxta tayyorgarlik ko‘rish maqsadida har bir mahallalardagi ijtimoiy himoyaga muhtoj, turmush sharoiti og‘ir xonadonlarga 600 kilogramdan bepul ko‘mir mahsulotlarining tarqatilayotgani ana shunday ishlarning amaliy ko‘rinishidir. Ta’kidlash joizki, tumanda ko‘mir zaxirasini yaratish, aholini ko‘mir bilan ta’minlashga qaratilgan ishlar belgilangan reja asosida davom etayotir.