Termiz davlat muhandislik va agrotexnologiyalar universitetida Angor tumanida qurilayotgan 1500–1600 MVt quvvatli issiqlik elektr stansiyasi loyihasi taqdimoti hamda talabalar bandligiga bag‘ishlangan anjuman bo‘lib o‘tdi. Unda viloyat hokimligi, xalqaro kompaniyalar vakillari, professor-o‘qituvchilar va talabalar ishtirok etdi.
Tadbirda Ulug‘bek Qosimov mazkur loyiha hudud energetika salohiyatini oshirish, sanoatni barqaror elektr energiyasi bilan ta’minlash va yosh muhandislar uchun yangi ish o‘rinlari yaratishdagi ahamiyatini ta’kidladi.
Loyiha Nebras Power, Siemens Energy, EDF hamda Quwatt B.V hamkorligida zamonaviy parogaz texnologiyalari asosida amalga oshirilmoqda. Uni 2027-yilda foydalanishga topshirish rejalashtirilgan.
Anjuman yakunida talabalar bilan ochiq muloqot o‘tkazilib, rezyumelar qabul qilindi va dastlabki suhbatlar tashkil etildi. Bu yoshlar uchun xalqaro kompaniyalar bilan bevosita aloqa o‘rnatish hamda kelgusidagi kasbiy faoliyatini belgilashda muhim imkoniyat bo‘ldi.
