Raqobat qo‘mitasi Yangi yil arafasida chakana savdoda yolg‘on chegirmalar va noto‘g‘ri ma’lumot berilishiga qarshi nazoratni kuchaytirmoqda. Joriy yilda qo‘mitaga 48 mingdan ortiq murojaat tushgan bo‘lib, aksar shikoyatlar — noto‘g‘ri narx va chegirma ma’lumotlariga oid.
Qoidalarga ko‘ra, sotuvchilar:
– chegirmani oxirgi 30 kun ichidagi eng past narx asosida belgilashi;
– chegirma muddati, miqdori va shartlarini aniq ko‘rsatishi;
– mahsulot soni cheklangan bo‘lsa, xaridorni oldindan ogohlantirishi;
– xaridor talab qilsa, avvalgi narx bo‘yicha dalil taqdim etishi;
– aksiya shartlarini o‘zgartirmasdan haqiqiy amal qilishini ta’minlashi shart.
Shuningdek, alkogol, tamaki, BADlar, dori vositalari va energetik ichimliklar bo‘yicha chegirmalar taqiqlanadi. Qoidalar buzilsa, javobgarlik va jarimalar qo‘llanadi.
