Surxondaryo viloyati va Eronning Fors viloyati o‘rtasidagi aloqalar izchil ravishda mustahkamlanmoqda. 7-8-noyabr kunlari imzolangan hamkorlik memorandumi asosida Surxondaryo delegatsiyasi Shiraz shahrida o‘tayotgan janubiy Eronning eng yirik sanoat ko‘rgazmasida ishtirok etdi.
Tashrif davomida delegatsiya Fors viloyatining sanoat salohiyati, ishlab chiqarish quvvatlari va innovatsion texnologiyalari bilan tanishdi. Tomonlar qo‘shma korxonalar tashkil etish, sanoat mahsulotlari ayirboshlashni kengaytirish, investitsion loyihalarni yo‘lga qo‘yish hamda Yevrosiyo bozorlariga chiqish masalalarini muhokama qildi.
Fors viloyati rahbariyati tashrifni mintaqaviy iqtisodiy diplomatiyani kuchaytirish yo‘lidagi muhim qadam sifatida baholab, o‘zbekistonlik investorlarning jalb qilinishi kelajakdagi hamkorlik uchun keng imkoniyatlar ochishini ta’kidladi.
O‘zbekiston, Iroq va Armaniston delegatsiyalarining ishtiroki bilan o‘tayotgan mazkur ko‘rgazma xalqaro sanoat hamkorligini rivojlantirishga xizmat qiluvchi muhim platformaga aylanmoqda.
