Qumqo‘rg‘on tumanida Yangi yil bayrami oldidan tantanali tayyorgarlik ishlari jadal davom etmoqda. Tuman hokimi Anvar Normamatov “Navro‘z” istirohat bog‘iga tashrif buyurib, bayramning ramzi bo‘lgan bosh archa o‘rnatilishi va bog‘ hududida olib borilayotgan bezatish jarayonlarini ko‘zdan kechirdi.
Tashrif davomida archa konstruksiyasining mustahkamligi va xavfsizligi, maydonning zamonaviy yoritish tizimlari bilan jihozlanishi, hududning bayramona ruhda bezatilishi bo‘yicha mas’ullar bilan muhokamalar o‘tkazildi. Shuningdek, o‘yin maydonchalari, fotoburchaklar, dekorativ arkalar va kompozitsiyalarning joylashuvi haqida tegishli ko‘rsatmalar berildi.
Qumqo‘rg‘onda amalga oshirilayotgan ushbu tayyorgarliklar Yangi yil bayramini aholiga ko‘tarinki kayfiyat, quvonch va bayramona shukuh ulashadigan darajada yuqori saviyada o‘tkazishga xizmat qiladi.
