Sherobod tumanida xalqaro ahamiyatga ega bo‘lgan M-39 va M-41 avtomobil yo‘llarini bog‘lovchi, Sherobod daryosi ustidan qurilgan yangi ko‘prik tantanalar bilan foydalanishga topshirildi. Mazkur ko‘prik Sherobod, Qiziriq, Jarqo‘rg‘on va bir qator boshqa yaqin tumanlarni o‘zaro bog‘laydigan muhim transport arteriyasiga aylanadi.
Loyihaning ishga tushirilishi hududlararo qatnovni yengillashtiradi, iqtisodiy aloqalar, savdo va logistika jarayonlarini jadallashtirishga xizmat qiladi. Tantanali marosimda Sherobod tuman hokimi Usmon Alimov, sektor rahbarlari, nuroniylar va madaniyat xodimlari ishtirok etdi.
Tadbir davomida so‘zga chiqqan tuman hokimi Usmon Alimov tumandagi aholiga yangi inshootning foydalanishga topshirilishi bilan tabrik yo‘llab, ushbu ko‘prik hududning rivojlanishida muhim o‘rin tutishini ta’kidladi.
Yangi ko‘prikning ochilishi tuman hayotida yana bir muhim bosqich bo‘lib, aholiga qulaylik yaratish, hududlarning integratsiyasini kuchaytirish hamda iqtisodiy faollikni oshirishga xizmat qiladi.
