Termiz shahar hokimligi hamda Maktabgacha va maktab ta’limi bo‘limi mutasaddilari tomonidan shahar hududidagi barcha ta’lim muassasalarining 2025–2026-yilgi qish mavsumiga tayyorgarlik holati o‘rganildi.
Tekshiruv davomida isitish tizimlari, yoqilg‘i zaxiralari, elektr ta’minoti, shuningdek, sinfxona va yotoqxonalar gigiyenik holati ko‘zdan kechirildi.
Monitoring natijalariga ko‘ra, aksariyat muassasalarda zarur ta’mir ishlari yakunlanib, isitish moslamalari soz holatga keltirilgan. Ayrim joylarda aniqlangan kamchiliklarni bartaraf etish bo‘yicha mas’ullarga aniq topshiriqlar berildi.
Maqsad — har bir o‘quvchi uchun qishda ham iliq, xavfsiz va qulay ta’lim muhitini ta’minlashdir. Shahar hokimligi bu boradagi nazoratni davom ettiradi.
