Termiz davlat universitetida an’anaviy “Talabalikka bag‘ishlov” tadbiri bo‘lib o‘tdi. Unda kunduzgi kechki va qo‘shma ta’lim dasturlari bo‘yicha o‘qishga qabul qilingan 3000 nafardan ortiq birinchi bosqich talabalari ishtirok etdi.
Tadbirda so‘z olgan rektor shunday dedi:
“Hayot – bu kitob. Bugun siz bu kitobda yangi sahifa ochdingiz. Bu sahifa “Talabalik” deb nomlanadi. Uni oddiy qog‘oz deb qaramang — u orzular bilan yoziladi, mehnat bilan to‘ldiriladi, intilish bilan bezatiladi. Va u sizning kelajagingizga aylanadi. Har biringiz bu sahifada o‘z tarixingizni yozish imkoniga egasiz”.
Tadbir davomida har bir talabaning kitob javoniga asos bo‘ladigan kitob ulashildi, muqovasida bitilgan ezgu tilaklar tilga olindi. So‘z olgan talabalar bildirilgan ishonch va yaratilgan imkoniyatlar ularning zimmasiga mas’uliyat yuklayotganini ta’kidladilar.
Shundan so‘ng, Rektor stipendiyasi sohiblariga sertifikatlar topshirildi.
Tantanali marosim universitet orkestri va badiiy jamoalarining konsert dasturi bilan davom etdi.
