Surxondaryo viloyatida yoshlarni xorijiy tillarni o‘rganishga keng jalb etish maqsadida amalga oshirilayotgan “2+6” dasturi doirasida ishtirokchilarga sertifikatlar va esdalik sovg‘alari topshirildi.
Mazkur dasturga ko‘ra, til kurslari uchun to‘lovning dastlabki 2 oyi yoshlar tomonidan, qolgan 6 oylik to‘lov esa davlat tomonidan qoplab beriladi. Bu esa yoshlar uchun sifatli til ta’limini yanada qulay va ommabop qiladi.
Tadbir davomida yoshlarga “YONDA” ilovasi orqali dastur imkoniyatlari, unda ishtirok etish tartiblari batafsil tushuntirildi. Shuningdek, ishtirokchilar o‘zlarini qiziqtirgan savollarga javob olib, dastur bo‘yicha fikr va takliflarini bildirishdi.
Ta’kidlanishicha, mazkur tashabbus yoshlarning xorijiy til o‘rganishga bo‘lgan qiziqishini oshirib, ularning bilim va kasbiy imkoniyatlarini kengaytirishga xizmat qiladi.
