Germaniyaning Xalqaro hamkorlik jamiyati (GIZ) loyihasi innovatsiyalar bo‘yicha menejeri, qisqa muddatli ekspert Sebastyan Xeld Boysun tumaniga tashrif buyurdi. Tashrif doirasida u GIZ loyihasi asosida viloyat miqyosida hamkor sifatida tanlangan Boysun tuman 1-son politexnikumi hamda tekstil sohasida faoliyat yuritayotgan “Feruza hunarmand” va “Shaxrinaz Dreams” mas’uliyati cheklangan jamiyatlari bilan yaqindan tanishdi.
Uchrashuvning asosiy maqsadi — loyiha doirasida mahalliy hamkor korxonalar bilan o‘zaro hamkorlikni mustahkamlash, innovatsion yondashuvlarni joriy etish hamda milliy qadriyatlarni asrab-avaylash bo‘yicha amalga oshirilayotgan ishlar bilan tanishishdan iborat bo‘ldi.
Shuningdek, ekspert Sebastyan Xeld tomonidan ta’lim muassasalari va ishlab chiqarish korxonalari o‘rtasidagi o‘zaro hamkorlikni kuchaytirish, yoshlar uchun amaliyot va malaka oshirish imkoniyatlarini kengaytirish yuzasidan taklif va tavsiyalar bildirildi.
Tashrif yakunida tomonlar hamkorlikni yanada rivojlantirish, mahalliy hunarmandchilik va ishlab chiqarish salohiyatini oshirish, shuningdek, milliy qadriyatlarni saqlash va targ‘ib qilishga qaratilgan qo‘shma loyihalarni amalga oshirish bo‘yicha kelishib oldilar.
