Xalq deputatlari Surxondaryo viloyati Kengashining navbatdagi sessiyasida aholi manfaatlariga xizmat qiluvchi muhim masala — fuqarolarning o‘zboshimchalik bilan egallab olingan yer uchastkalari va ularda qurilgan bino-inshootlarga bo‘lgan huquqlarini tan olish masalasi ko‘rib chiqildi.
Sessiya yakunida 584 nafar fuqaroning yer uchastkalariga bo‘lgan ijara huquqi, shuningdek, u yerda qurilgan bino va inshootlarga bo‘lgan mulk huquqi rasmiy ravishda e’tirof etildi. Ushbu qaror — qonun ustuvorligini ta’minlash, fuqarolar va tadbirkorlarning mulk huquqlarini qonuniylashtirish, meros va mulk bilan bog‘liq nizolarni bartaraf etish hamda aholining huquqiy ongi va ijtimoiy kayfiyatini ijobiy tomonga o‘zgartirish yo‘lida muhim qadam bo‘ldi.
Shu kunga qadar Surxondaryo viloyatida jami 2 103 nafar fuqaroning yer va mulkka bo‘lgan huquqlari qonuniy asosda tan olingan. Ushbu yondashuv fuqarolarning manfaatlarini himoya qilishda tizimli va adolatli yechimlar barpo etilayotganini ko‘rsatmoqda.
