O‘zbekiston Respublikasi Xotin-qizlar qo‘mitasi raisining o‘rinbosari Umida Abdullayeva Surxondaryo viloyatida bo‘lib turibdi. Ayni tashrif doirasida hududlarda bo‘lib, oilalar, xotin-qizlar bilan yaqindan tanishib, shart-sharoit va muammolarni o‘rganishga bel bog‘lagan. Sherobod tumanidagi “Majnuntol” mahallasida yashovchi, boquvchisini yo‘qotgan, daromad manbayiga ega bo‘lmagan Toybibi Nasriddinovaning xonadoniga borildi.
U yerda uy-joyning ta’mirlash ishlari bilan tanishildi, shuningdek, ayolning ijtimoiy sharoiti, yashash muhiti, farzandlarining holati va boshqa ehtiyojlari o‘rganildi. Tegishli mutasaddilarga xonadonni tez fursatda ta’mirlab berish, zarur ijtimoiy ko‘mak choralarini ko‘rish yuzasidan tavsiyalar berildi.
Shundan so‘ng, “Buyuk Ipak yo‘li” mahallasiga tashrif buyurib, u yerda faoliyat yuritayotgan mahalliy tadbirkor, hunarmand Shohida Hasanovaning qo‘l mehnatiga asoslangan ishlari bilan yaqindan tanishdilar. Hunarmand ayolning o‘z mehnati bilan yaratayotgan mahsulotlari, ularning bozordagi talabi hamda boshqa xotin-qizlarga namunaviy faoliyat sifatida xizmat qilayotgan tajribalari yuqori baholandi.
Ushbu mahalladagi tashrif doirasida O‘zbekiston Respublikasi Xotin-qizlar qo‘mitasi raisining o‘rinbosari Umida Abdullayeva tomonidan g‘ayriijtimoiy xatti-harakat sodir etishi mumkin bo‘lgan voyaga yetmagan qizlar bilan profilaktik suhbat o‘tkazildi.
Suhbat chog‘ida Nozima Xusanova ham ishtirok etib, yosh qizlarga sog‘lom turmush tarzi, ijtimoiy muhitga moslashuv va o‘z salohiyatlarini to‘g‘ri yo‘nalishga yo‘naltirish borasida tushunchalar berdi. Tashrif yakunida vazir o‘rinbosari tomonidan qizlarga ma’naviy-ma’rifiy kitoblar sovg‘a qilindi, ularning o‘qishga bo‘lgan qiziqishini oshirish va ongini boyitish maqsadida iliq tilaklar bildirildi.
