Bugungi kunda zamonaviy o‘zbek tasviriy san’atiga ko‘plab yosh iste’dodlar kirib kelmoqda. Turli yo‘nalishlarda ijod qilayotgan rassom, haykaltarosh va xalq amaliy san’ati ustalari o‘z ijodlari orqali san’atimizga yangicha mazmun va shakl bag‘ishlamoqdalar. Ayniqsa, Surxondaryo viloyatida tasviriy va amaliy san’at yo‘nalishlarini rivojlantirishga alohida e’tibor qaratilmoqda.
Shu maqsadda Surxondaryo viloyati hokimi Ulug‘bek Qosimov O‘zbekiston Badiiy akademiyasi raisi Akmal Nuriddinovni qabul qildi. Uchrashuvda mazkur sohada amalga oshirilayotgan ishlar, mavjud muammolar va ularni bartaraf etish masalalari muhokama qilindi.
Xususan, ijodkorlarni qo‘llab-quvvatlash, ular uchun munosib sharoitlar yaratish, viloyatdagi Badiiy akademiya a’zolari uchun maxsus ustaxonalar tashkil etish bo‘yicha takliflar ilgari surildi. Shuningdek, Surxondaryoda tasviriy va amaliy san’atni yanada rivojlantirish va takomillashtirish bo‘yicha amaliy chora-tadbirlarni o‘z ichiga olgan “Yo‘l xaritasi” imzolandi.
Yakunda voha ijodkorlarining Yevropa mamlakatlarida ko‘rgazmalarini tashkil etish, har yili bahor oylarida Boysun tumanida xalqaro rassomlar festivalini o‘tkazish hamda Ro‘zi Choriyev nomidagi ixtisoslashtirilgan san’at maktabi uchun 60 o‘rinli yotoqxona binosi qurilishi belgilandi.
