TerDUda ilmiy-amaliy seminar o‘tkazildi

Globallashuvning ham ijobiy va salbiy tomonlari mavjud bo‘lib, u xalqlarning, davlatlarning, milliy madaniyat va iqtisodiyotlarining yaqinlashishini tezlashtirib, rivojlanishi uchun yangi imkoniyatlar eshigini ochsa, boshqa tomondan minglab mayda, etnik guruhlar va millatlarning madaniyati, tili, rasm-rusumlari jahon bo‘ylab kuchayib borayotgan globallashuv jarayonlarida katta millatlar, yirik milliy madaniyatlar, boy tillar bilan raqobatlasha olmay, o‘z-o‘zidan faol ijtimoiy-iqtisodiy, lisoniy – zaboniy hayotdan chetga chiqib borishiga olib keladi. Mana shunday vaziyatda har bir xalq madaniy, ijtimoiy-iqtisodiy va lisoniy jihatdan qat’iy turishi, munosib kurashmog‘i lozim. O‘zbekistonda SHHT Xalq diplomatiyasi markazi va Termiz davlat universiteti hamkorligida “Globallashuv sharoitida ilmiy va madaniy merosni saqlashning dolzarb masalalari” mavzusida o‘tkazilgan ilmiy-amaliy seminar ham ana shunday kurashning amaliy ifodasi bo‘ldi.
Seminarda soha mutaxassislari, faol yoshlar ilmiy va madaniy merosni saqlashning hozirgi holati, turizm istiqbollari, tarixiy yodgorliklarni asrab-avaylash va yoshlarni ular bilan yaqindan tanishtirish masalalarini muhokama qilishdi. “Milliy merosga mening hissam” ekspeditsiyasi doirasida poytaxtdan tashrif buyurgan talabalar tengdoshlari bilan o‘zlari o‘qigan sevimli kitoblarini almashdilar.
Shundan so‘ng, talabalar Termiz davlat universitetidagi laboratoriya xonalari, kutubxona, muzey, sport to‘garaklarida yaratilgan shart-sharoitlar bilan tanishdilar.